ayamun
CyberRevue de
littérature berbère
17 ème année
Numéro 87 Janvier 2017
|
Tidlisin nniḍen : http://www.ayamun.com/telechargement.htm |
Prénoms algériens authentiques (mis à jour et augmenté)
1°) Le texte : IMEṬṬI N BAB IDURAR, (adlis yura Wakli Kebaili (Azwaw) i
d-yerra Sɛid At-Mɛemer d asefru, aḥric 1u
2°)
La
conférence : Renaissance de la culture berbère : l'exemple
kabyle, par Ramdane At-Mansour Ouahes
3°) L'hommage : MAMMERI DANS LA GUERRE, http://www.lanation.info/Mammeri-dans-la-guerre_a111.html
5°)
Tazmilt
ɣer tira : Awalen imzikiyen i
d-nekkes si « Poèmes Kabyles Anciens » n Dda-Lmulud Mammeri,
afensu-nneɣ
6°) Tidlisin nniḍen, en PDF :
7°) Le poème : Nendeh, sɣur Massa Zedjiga Belaidi
8° )
Toutes les rubriques :
Numéro 87 Janvier 2017
Le texte:
IMEṬṬI
N BAB IDURAR
(adlis
yura Wakli Kebaili (Azwaw) i d-yerra Sɛid At-Mɛemer d asefru
(aḥric
1u)
D asefru ad zegreγ tura γef tmerγa i
γ-yeğğan ncaḍ.
Ad as-azneγ tisura i tmuγli n wul asemmaḍ.
Ad tekker ad tcali di tmura, ahat ad yefsi weblaḍ
deg taddart ideg yeḍra, wayen ur neḍra
di tiyaḍ.
I weqcic d-yeffγen seg-s, sani ara yesiweḍ
tameddit?
Deg iḍarren-is akk yeseγreṣ, yeṭṭef-it
yiḍ di taddart TALWIT.
Seg wakken ur yesεi amwanes, axxam n
yemsebriden yeţnadi-t.
Yenneqlab kan yesla i lḥes, iwala amγar
yeḍfer-it.
Azul fell-ak a baba amγar, anda-t wexxam n
yemsebriden?
Yya-d a mmi ad nelḥu amecwar, ur yelli d win
ibeεden.
Amγar zdat-s yezwar yerna d win i t-yesawḍen.
Yedda yid-s almi d imi n wemnar n wexxam n
yemsebriden.
Atan a mmi ihi wexxam, anida i tzemreḍ ad teṭṭṣeḍ
yerna ngum a d-yeγli ṭṭlam, a k
d-awin imensi ad teččeḍ.
Di tlemmast n taddart i tebnam, axxam-agi iγer
i d iyi-teskecmeḍ.
Tura γas kkes ţexmam, tanemmirt! Ihi ar
tayeḍ.
Aqcic yeqqim di tqernit n wexxem ideg
t-yeğğa wemγar.
Γas ma teγli-d tmeddit, γef imensi
ur igir tisγar.
Yak taddart-a isem-is TALWIT, i truẓi uqerru,
acuγer?
Ur tezlig fell-as targit, asirem deg yiman-is ur
yesemγer.
Ur yuḥtam almi s-yesla, yezzi-d kan deg-s
iwala,
m wul ur nesin tebrek.
D tamγart teččur d leḥmala,
amuḍin ma yeẓra-ţ yeḥla,
ad yeqqel amzun werğin yehlek.
Azul a mmi aql-aγ nella, ugmeγ-d aman si
tala,
tura a d-uγaleγ γur-k.
Azul yes-m lεeslama, s tezmert-im a yemma,
γur-i yuzen-ikem-id lmelk.
Tasusmi terna teggugem, s kra yesawlen irekkem,
yeγli s iciwi n trusi.
Tamγart tesaweḍ aman d-tugem, teṭṭef
deg wawal tṛeggem,
tewwi-d i inebgi imensi.
Ay iḥulfan tuccagem, mi akken s-tefka abernus
d-teddem,
teggull i usemmiḍ ur yensi.
Aqcic d uḥdiq ur yesusem, dγa s ul n
temγart yekcem,
teddem tebda-yas-d asteqsi:
Tamγart s wawal teţaẓ, tesen tiẓeṭ
ideg d-tesquccuḍ.
A mmi teεyiḍ terniḍ laẓ,
ansi-k, anida ţedduḍ?
Deg iqerra susmen yebẓaẓ, ay aqcic d
acu teţrağuḍ?
Ugadeγ ad iyi-d-teddmeḍ aεekkaz, a
d-tiniḍ kker ad telḥuḍ!
Tideţ lemmer ad am-ţ-iniγ, ul-im
seg-s a yemma ad mḥuγ.
Mi kkreγ a d-mmektiγ, ad zzreγ s
anda teţuγ.
Ur cfiγ ansi i d-kkiγ, ur ẓriγ
anda tedduγ.
Ţuγ daγen isem ay sεiγ, i
tura d acu ad am-d-rnuγ?
Ad rfuγ fell-ak, acimi? Ad teqqimeḍ akka
ar melmi?
Ihi aţah tideţ ssneγ:
A k-iniγ yiwen wawal a mmi, yya-d ad teqqimeḍ
γur-i,
nekk iman-iw i zedγeγ.
Axxam meqqer ad aγ-yawi, amḍiq ad yegri,
ad iyi-twanseḍ a k-wanseγ.
Tixsi a γ-d-tefk ayefki, ayen is ara nedder ad
yili,
awal aql-i ad ak-t-fkeγ.
Aqcic yesbek, yeţwehhim, ur yumin ara imeẓẓuγen-is.
Maca, d asusam ur yeqqim, yemḥaḥed,
yeldi imi-s:
Yenna-yas ma yella s tideţ-im, " yesaked
tamγart s allen-is",
ad qqimeγ, err-iyi d mmi-m! Γef tuyat yeẓẓel
afus-is.
Γas amzun seg igenni i d-γliγ, teldiḍ-iyi
ay asirem ul-ik.
D tideţ ayagi ţwaliγ neγ
tγurr-iyi targit-ik?
Tenna-yas kker i d ak-nniγ, deg wexxam ad
tkemmleḍ učči-k!
I tura amek ara k-semmiγ, imi akka teţuḍ
isem-ik?
Tiririt yelhan ur ţ-yeẓri, yufa-yas-d
tin is ur yeγliḍ.
Akken i m-yehwa semmi-yi! I s-yerra ur yezzi, ur
yenniḍ.
S wawalen d-turew tayri, tenna-yas ur nwiγ
almi d-teflaliḍ.
Ihi a mmi a k-semmiγ ITRI, amzun seg igenni i
d-teγliḍ.
Yenna-yas yelha yisem-agi, yekcem igenni wis-sa.
Isem-is tura temγart-agi? Tenna-yas isem-iw
BISBISA.
Yelha ula d isem-agi, ikemmel učči mi d
as-d-tesa.
Kker a mmi ad teṭṭṣeḍ dagi,
aṭas i d-telḥiḍ as-a!
ITRI yekcem γer wusu, yewwet-iţ γef
yiwen yidis.
Yebred nezzeh si εeyyu, amzun aseggas ur yeṭṭiṣ.
Azekka-nni teğğa-t ad yesteεfu,
BISBISA ur yesli i lḥes-is.
S leḥder i tqeddec i tleḥḥu yerna
zik i d-teldi tiṭ-is.
Almi izeggen wass i d-yekker, ulac γef wacu
ara yeccetki.
Am winna yeṭṭṣen yeskeṛ,
yuki-d yeţnadi a d-yemmekti.
Di ddunit wa yesεa ẓẓher, wayeḍ
tawenza ur d as-tefki.
Tefka-yas-d BISBISA ad yefḍer, tesers-as-d
tazart d uyefki.
D ayefki n tixsi i k d-sewweγ, ečč
tazart d ak-d-serseγ,
as-agi ad ncali, ad nḥewweṣ!
Mi s-tenna ečč akken ad neffeγ,
yemmekti-d γer BISBISA i yezdeγ
yerna ad yeqqim γur-s.
Ul-is yecreh yeţaḍṣa, d win turew
i temlal tasa,
γas ma s tideţ mačči d mmi-s.
D acu ara xedmen as-a? ITRI yeffeγ d BISBISA,
tesken-as-d taddart d iḥerqan-is.
ITRI yuγal am mmi-s, ikes-as tixsi-s
yerna izeddem-as-d isγaren.
Yerra lqeḍyan d suq-is, d aẓidan
yiles-is,
yeḥdeq s arrac s imγaren.
Di tiḥerci-s kra ur yenγis, ḥemmlen
at taddart tikli-s,
γas ma d terẓeg n tiṭ i yezzewren.
Seεd-is yuki ur yeṭṭiṣ,
tgerrez ddunit-is,
iḥemmel yemma-s t-iḥemmlen.
Yiwen wass deg wusan, d aṭṭan amcum i
d-yesteqsan,
BISBISA teṭṭef tiγmert.
Ay adfel γef uqerru yesan, d acu akka i
d-yusan,
d acu yeţrağun tamγart?
Yak kra win i t-iheggan, yeḥrec ur yeggan,
amdan tegguni-t taγert.
Ay ITRI awi-d sin inagan, leεmur ţafgen,
ngum a d iyi-tcuddeḍ taγeṣmart!
Gilda d Salu yegla-d yes-sen, BISBISA tenna-yasen:
ţxil-wat aẓet-d γer γur-i!
A tamuṭṭut d wergaz ay iεzizen,
lecγal yesefk ad berzen,
yak ur yelli d ayen n diri?
Cfut a widak igerrzen, azekka ur neẓri d acu
a d-yasen,
lmut tura γef yal d iri.
Axxam-iw d neţa ara t-izedγen, iḥerqan-iw
d neţa a d-ṣaḥen,
kra a d-ğğeγ d ayla n YETRI.
Ddunit akka i tella, yelha wayagi d-tenniḍ.
Kemm tenniḍ nekkni nesla, awal ur yezzi, ur
yenniḍ.
ITRI ad yawi axxam lexla, kkes akk aγilif
tesεiḍ!
Tezmumeg acemma BISBISA, drus kan teγli,
teţγiḍ.
Teţban-d am wakken teṭṭeṣ,
temmut mi teγli γer deffir.
ITRI tγaḍ aṭas, aṭas, Yekker
ad yeţru, neţa ur yezmir.
Yeqqel i wallaγ iḥeses, BISBISA tedder
di lxir.
Yeẓra yecreh wul-is yes-s, talwit ideg tella
ur teffir.
ITRI yegra-d iman-is deg wexxam i
s-d-teğğa BISBISA.
D tixsi i d tamwanest-is, beṭṭu yejreḥ-as
tasa.
Ikemmel am medden tameddurt-is, almi d asmi
d-yuγal si lexla.
Yekker ad yekcem s axxam-is, yufa ur yezmir ara.
Yeḍra wayen ur nḍerru, tagi d
tideţ d tamuffirt.
A ziγ awezγi ur yeţkukru, ur yesin
timendeffirt.
Tawaγit n YETRI d asefru, tewwet-it-id
tferract n tewwurt γer tgecrirt.
I tedyant-agi amek ara ţ-yefru, lqermud n
wexxam ddaw timiṭ?
Inuda yufa-d tiririt i yesteqsiyen s wayes i
s-yekcem ţexmam.
Kker kan ad teṭṭṣeḍ di tebḥirt
ay ITRI yugaren axxam!
Γas ulamma d tameddit, d azγal, anef a
d-yeγli ṭṭlam!
Walit ay at taddart walit, d leεğeb a
ddin qesam!
Azekka-nni mi yuli wass, at taddart wehmen akk
deg-s
yerna ur t-εqilen ara.
Akken llan uzzlen γur-s, tamezwarut
yemmeslayen yid-s,
TAFAT i d isem-is tinna.
Taqcict testeqsa-t tenna-yas: Anisi-k ay argaz?
D ITRI, amek ur d iyi-tesineḍ ara?
Amek? D kečč i d ITRI? Awwah, amek
akkagi?
I wannect-a amek i d-yusa?
Nniγ-am ITRI d nekkini, d TAFAT kemmini,
atan wexxam n BISBISA.
Uhu yiwen ur t-yenni, umnen-t d tirni,
imi d-yuder BISBISA.
Ay akka yecmet wudem-is, amzun d amadaγ uqerruy-is,
iγallen-is d ayen ur neţwabdar.
Annect n sin yetrakturen iḍaren-is, ITRI yemḥa
later-is,
isem-agi yečča-t yeγẓer.
Taddart yesagad arrac-is, ur t-ḥemmlen
lγaci-s,
sawalen-as BAB IDURAR.
Yelha imi d-nezger asefru, d inigi n wakud amesas.
Tindict yes-s ara tefru, i umezruy ad yeqqim d
aεesas.
I teqṣiṭ γezzif usaru, yella wacu
ara yekrez wemru,
ccḍeḥ war tiqeṣrit yers-as.
BAB IDURAR yeṭṭef aqerru, deg yiḍ
yeţwanas bururu,
ur yeggan daγen deg wass.
Cemteγ, ugin-iyi medden, kerhen-iyi widak ḥemmleγ.
Arrac deg-i ţagaden, ihi tura amek ara
xedmeγ?
Takti deg wallaγ tedden, ḥala tiẓgi
ara d iyi-irefden,
amadaγ as-a a t-kecmeγ.
Amdun d neţa i t-yeγzen, yeggan di
tlemmast-is am wuccen,
asemmiḍ deg wezγal yeffeγ.
Ur yeţagad uccanen d yilfan, ur zmiren a d-zzin
γur-s.
Maca, smaḍiḥ asmi d-stufan, asemmiḍ
n tegrest iteqqes.
D acu n tqubbet-agi d-yennulfan? Di ddunit ulac
anwa i yecfan,
i tnezduγt ad yekken nnig-s.
I leεğeb ifasen ur krifen, yesuli axxam
zdat wasif s icerfan,
atan amek yefra ccγel-ines:
Ur yeḥwağ agelzim d telwaḥt, s
ufus kra yellan yezmer-as.
Yezwar deg uweṭṭi n tberṭeḥṭaḥt,
deffir-s sakin yeγza llsas.
Aman seg wasif i d-yugem, deg tayedwin yegzem,
lebni n iγerban s yedγaγen d waluḍ
yers-as.
iseqqef axxam s tayedwin yakk d teblaḍin,
isγaren ubelluḍ deg tewwura d ṭṭwiqan
fkan-as.
Yesbedd axxam annect n wedrar, yezdeγ deg-s
iman-is.
Lεib-is deg umadaγ yeṣṣer,
akka i d as-yenna wul-is.
Ur yeseγzef amecwar, ur yurğa ar d yemmet
si ccer,
tiẓgi hraw wakal-is.
Deg inijel yegzem yeẓber, deg wenγac d
tyerza yezwar,
atan wayen yeẓẓa di tebḥirt-is:
Ifelfel, tajilbant, taga, lebṣel, lleft,
zrudiya,
lḥemmeṣ, ddellaε d texsayt.
Akbal, lekremb, claṭa, afeqqus, ibawen,
lubya,
nneɛnaε, akbal d tiskert.
Yuγal yeγza igeḍyen deg tama-nniḍen,
i ččina, rremman d tẓurin.
Ma deg iḥerqan imeqqranen, yak widak banen,
yezreε irden d temẓin.
Yerwa aγrum n yirden d temẓin, aksum n
yewtal d tsekrin
d win n yilfan umadaγ.
Tisit-is d aman d wid n tẓurin, ẓẓeεter
d nneεnaε ur t-xḍin,
am Rebbi di Fransa i yezdeγ.
Γas wid yeţnadin ufan, tamuγli n
wemγar ad teqqel am tin n llufan,
seg wayen ara walint wallen-is.
Iceṭṭiḍen yesburr medden ur d
asen-d-cfan, s weglim n wuccanen d yilfan,
i d-ifeṣṣel i weglim-is.
Ameskar n tullist akken i d-yenna, BAB IDURAR ur
yezmir ara,
ad yedder deg taddart TALWIT.
S wayen n diri i ţmeslayen fell-as merra,
γas ulac win i wumi
yexdem kra,
rran-t amzun mačči d amdan a
tawaγit.
Yir lehdur ffγen fell-as, yerra-ţ i
uxemmem.
Yeţxemmim am yiḍ am wass, amek ara
yexdem.
Amek ara yendi tasennart, akken iḥemmel
lγaci n taddart,
ula d nutni am zik a t-ḥemmlen.
Ayen yeţnadi yufa-t, takti tban-as-d am tafat,
mi s-tceṭṭeḥ zdat wallen.
Mi yesalay leḥsab-is, amzun iḥeţeb
deg iḍudan.
mi yemwafaq d rray-is, ffγen-as-d sin iberdan :
Yesefk imcumen ad ẓren, γas qqleγ d
win icemten,
mačči d nekk i ifernen axesar.
Ilaq daγen ad faqen, nekkini mazal ḥemmleγ-ten
yerna mačči d aqeṣṣer.
Awwah, tikti tamezwarut, ur ḥṣiγ
ara a ţ-fehmen.
A sen-d-sekneγ taneggarut, wisen ahat a yi-ḥemmlen.
Annect-a deg twenza-s yura, ula d neţa yeẓra,
atan ihi amek i yexdem :
Win yekkren ad yerfed kra, ma ẓẓay ur
s-yezmir ara,
a d-yas neţa a s-t-yeddem.
Yal win ara yekkren ad yebnu, d neţa ara
ibibben taεekkemt-is.
S yedγaγen d yejga a s-d-yeglu, a t-yerr
yeldi deg yimi-s.
Ma d afeqqus, ččina d tẓurin,
steqsi arrac ma ur ten-ṛwin,
war ma neţu ayen akk nniḍen
ččan seg ufus-is!
Tayri teffukti am tyedrin, d ayen yeţnadi i
d-yezzin,
uγalen ḥemmlen-t at taddart-is.
Yiwen useggas deg unebdu, qqurent merra tliwa.
Γas a d-yecnu Yidir " sendu ",
tamurt teffud ur teswa.
Azγal deg ifadden yeţcuddu n win ur
nezmir ad yeddem ad yeddu,
medden ţargun timiqwa.
Imγaren d imuḍan amek ara sen-tedṛu?
Fad amcum taddart a ţ-yexlu,
lemmer BAB IDURAR ur yeqwa.
Imdanen yesefk ad swen, kra n waman deg wasif llan.
Ugmen-d wid izemren i usawen d wezγal n yiḍ
d izilan.
BAB IDURAR yelha-d d yemγaren, imeẓyanen
d wid yuḍnen,
yeserwa-yasen akk aman.
Γas udem-is seg wid icemten, ul-is ḥnin
walan-t medden,
arrac uγalen ţwalin-t d amelḥan.
Yiwen wass deg wusan unebdu, yeffeγ-d yiwen
wergaz, iteddu
deg webrid γer tlemmast n taddart.
D neţa i d-yeffγen d amezwaru, ur yenwi s
tedyant-a ad teḍru,
ur yeẓri acu t-yurğan zdat.
Argaz iγil yeţargu deg wayen
yeţwali, acku
ngum tefrari tafat.
Yuγal yeẓmeḍ aqerru, yesawal s usuγu,
ffγet-d ay at taddart.
Yiwen ur d-yegri yexxuc, din din wwḍen-t
qeccuc meccuc,
γilen yeḍra lhemm ameqqran.
ur d asen-teffiγ am leεrac rran d
leεruc, mi sfeqden leɛcuc,
qqsen-ten-id izerman.
Ulayγer asemγer uxenfuc,
fru-yaγ-ţ-id a mummuc,
ini-yaγ-d d acu yeḍran!
Win i t-yesbezgen ad aγ-d-irucc,
mačči d turart ulelluc,
yenna-yasen ẓẓulleγ
wwiγ-awen-d aman.
At taddart s wallen ḍefren iḍudan-is
anda sneεten,
imiren tafat tufrar.
Walan aman la ţcercuren, am wasif i
d-teffγen
seg ddaw wexxam n BAB IDURAR.
Ameẓẓallu-nni yenna-yasen
: D nekk i d sebba-nsen.
A yemma-s mmi-m yezmer!
Dγa MUSNI i d as-sawalen, deg icuḍaḍ
uqendur-is sudnen,
si zik yerra iman-is yeẓwer.
Tudert i MUSNI! Tudert i MUSNI!
Uγalen akk i ţsuγun.
Yerγa wul n teqcict-nni, TAFAT, tugad a d-tini
kra at taddart ad rfun.
Teεreḍ tazwara teṭṭef imi,
yečča-ţ wul-is terfed tiγri,
tura d tideţ a d-yestufun :
Arğut ay at taddart! Arğut! MUSNI
annect-a yeţargu-t.
Slan-as medden akk susmen.
A MUSNI fru-yaγ-d taluft! Ma γlin-d seg
igenni γef tmurt,
acuγer mačči seddaw wexxam-ik i
d-ffγen?
Tiγerγert tebda teţsummu-t, yeqqur
din amzun yemmut,
udem-is d tezweγ i t-isebγen.
At taddar merra susmen, ldin i waḍu
imawen-nsen,
yesuffeγ-d awal DIDI :
A tiyesetmatin, ay atmaten, yesefk iḍarren-nneγ
ad awḍen
axxam ideg d-ffγen waman-agi!
DIDI d argaz iḥercen, si zik i wawal yesen,
γur-s ulac anεam sidi.
Lγaci-nni merra nnan :
d tideţ, d awal yelhan,
kkren akk uγen awal-is.
Uzzlen s axxam-nni ad ẓren, ansi akka i
d-ffγen waman,
MUSNI yesemneε iḍarren-is
Yesenser s axxam yekcem, tura azzel faqen-ak a
lhemm!
Akka i d as-yenna wul-is.
Axxam n BAB IDURAR, seg-s i d-yeffeγ
wasif-nni.
TAFAT deg ugerjum-is tesemγer, amzun tesawal s
igenni:
BAB IDURAR! Wa BAB IDURAR! deg wawal ur d
as-d-yerri.
At taddart sawlen-as daγen, yegdel-iten ula d
nutni.
Yiwen wergaz yenna-yasen: Deg wexxam wagi ur yelli.
Yiwet tmeṭṭut gar-asen
: Ula si teẓgi a d-isel i teγri.
TAFAT tenna ayen tesen: Wagi ad yili yuḍen
ihi.
Tdemmer tawwurt s ifasen, tufa-ţ ur temdil,
teldi.
Γer wexxam tekcem TAFAT, lγaci urğan
ar ţ-id-tefru.
BAB IDURAR dinna tufa-t, yeqqummec meskin
yeţru.
Iγaḍ-iţ, yegzem tasa-s, dγa
teţru ula d neţat.
Lγaci uγalen jban-d fell-as, walit
tideţ ay at taddart!
Imeṭṭawen-is ţcercuren, amzun ḥemlen-d
iγeẓran.
Seg tzuliγt γer berra teffγen,
uγalen d agelmim n waman.
Ldin akk imawen-nsen, wehmen deg wayen walan.
Qqimet-d a lγaci ad teslem, yid-i ata wayen yeḍran:
Yekker ad yeḥbes imeṭṭi, maca, ur
yezmir ara.
Yuγal yenna i lγaci: "Ẓriγ
d acu yeḍran tura.
Urgaγ asmi ay lliγ d ameẓyan, d
wayen akk yid-i yeḍran,
ukiγ-d γef targit cfiγ.
Ihi ula d nekk sεiγ imawlan, ad
awen-mleγ wi d iyi-ilan,
ata wayen akk d-mmektiγ":
Nekkini d mmi-s n TAKLIT, baba d AKLI N AT WADDA.
Γas ma tewεer teqbaylit, cfiγ
γur-i yiwet weltma.
Tesmekti-yi-ţ-id targit, weltma isem-is
TANINNA.
Imi ameddakel-is AGGUR, tḥemmel-it,
yeggull-as baba γef leqraya.
Yesnejmaε-iţ-id γer ger
temγarin, atan γef wacu yeggull:
Iwala tesufeγ-d tidmarin,
yesufeγ-iţ-id si lakul.
" Rebḥen ufan-t" ur γrin, ur
yelli i d aγ-d-ğğan lemtul.
Lemmer kan ur d asent-rnin i tullas lehlak n wul.
I tmuγli n ṭṭaq i ţ-sersen,
melmi a d-iḍegger AGGUR wass.
Mi t-twala teẓra tesen, abrid n tala deg wul
yuγwas.
Ugur n taluft asen, baba ur yeεdil d baba-s.
Mi tewweḍ ukkuẓ d mraw iseggasen,
yebγa a ţ-yefk i mmi-s n gma-s.
Yiwen wass lewhi imensi, yanna-yas baba " a
yelli,
atan mmeslayeγ d gma”.
Fell-am nefra-ţ as-agi, mmi-s d yir aqcic ur
yelli,
ur kem-yeţxaṣṣ wacemma.
TANINNA tenna-yas " Nekkini"?,
ulayγer tḍebbreḍ fell-i,
wagi ur t-ţaγeγ ara.
Awal ngum i t-id-tekfi, tečča ayen
iγef ur tebni,
yejbed deg-s s ubeqqa.
Teṭṭerḍeq d imeṭṭawen,
tuzzel γer texxamt-nniḍen,
awal ur d-yuli imi n yemma.
D nekkini i d-ineṭqen, kkreγ ad
as-iniγ ayen,
yegzem-iyi awal yenna:
Kečč ṭṭef imi-k kan susem!
Baba-k yeẓra ayen yelhan, yesen,
anwa i iḥekmen da tura?
„ Am win ara yeqqnen taγaṭ i wuccen“,
tecfiḍ ay asen,
akka i s-nniγ i baba.
Nniγ-as " d lbaṭel a baba",
yefka-yi tiyita,
ceḍḥen ifeṭṭiwjen zdat
wallen-iw.
Kečč mačči d argaz a ccmata,
akka i d iyi-yenna,
yenna-k yerna fkiγ awal-iw.
Tameṭṭuṭ a mmi ur tesin ara, ṣaḥḥa
di yemma-k ṣaḥḥa,
ur tselleḍ ara i lehdur-iw.
Susem i d iyi-tenna yemma, qader a mmi baba-k tura!
dγa ffγeγ, yeqber wul-iw.
Yezzi-d waggur amzun tefra, amzun acemma ur yeḍra,
baba yesen amek yefren.
Sliγ mi akken s-yenna i yemma, smana i
d-iteddun d tameγra,
awi-d tidak ara ifetlen.
Akken i s-tesla TANINNA, werriγ wudem-is
merra,
amzun ffγen-t idammen.
Teğğa almi yeffeγ baba, γef
wexxam n gma-s tenna:
„Iḍarren-agi ur t-keccmen“.
Baba-m yeẓra i d am-yelhan a yelli yerna
nekkenti,
akka i yura di twenza-nneγ.
D acu nezmer a t-nexdem akkagi? Ula d nekkini
ur sineγ baba-m asmi t-uγeγ.
Mi d as-tenna yemma ayagi, tenna-yas nekk
mačči d kemmini,
nekk s wayen yenna Brecht, umneγ.
Nekk ul-iw ur yeţergigi, win
yeţnaγen yezmer ad yeγli,
ma ur nnuγeγ, ḥseb xeṣreγ!
Yesefk a yelli ad tṣebreḍ, ulac d acu
ara txedmeḍ,
annect-a yura di twenza-m.
Argaz-im a t-tennameḍ, yiwen wass a t-tḥemmleḍ,
ula d nekk nnumeγ baba-m.
Lebγi-nneγ merra a t-naweḍ, asmi
ara tjewğeḍ,
d dderya ad teččareḍ axxam.
Ilaq a yelli ad tẓewreḍ, mazal ad
tisineḍ,
mačči d kra ara tisin tizzya-m.
Imiren TANINNA tesusem, di tyita tesebleε,
tečča-ţ.
Teẓra d acu ara texdem, neţat d rray-is
tefra-ţ.
Yegra-d yiwen wass a d-asen akken a ţ-xemmlen,
iqeffafen,
teţru, tugad tameγra.
Azekka-nni mi d-kkren, amzun d lqaεa i
ţ-yesbelεen,
yiwen ur yeẓri anda terra.
Baba yeqqel am umeslub, times tendeh deg wul-is.
Mi ara yeţmeslay, yesleblub, am wesfeγnen
lehdur-is.
Yuzen-iyi imiren γer gma-s, yenna-yi „
siwel-as a d-yas!",
nekk uzzleγ, uγeγ-as awal.
Yewweḍ-d gma-s yenna-yas: " Anef-as kan,
anef-as,
imi teţnadi γef cckal”.
Ad neẓẓiẓ tameγra akka
walaγ, ad tili smana d-iteddun.
TANINNA as-a a ţ-id-afeγ, yid-s d cckal
kan a ţ-yefrun.
Tasa-w yesefk a ţ-qqdeγ, jmaεliman
ar ţ-qqneγ,
alamma yewwi-ţ mmi-k.
As n tmeγra a wen-ţ-in-fkeγ, seg
wexxam-iw mi n-teffeγ,
a gma ḍebber aqerruy-ik!
At taddart ufan-d ccγel, imawen ţkuffuten
am wasif :
Yelli-s n WAKLI N AT WADDA terwel, abbuh teγḍel-as
nnif!
Yeγli-d yiḍ, yuγal-d baba, ur yufi
ara TANINNA,
nekk teţeγ imensi imiren.
Yenna-yi " kker syinna"! Kečč
teẓriḍ anida tella,
imi d tuffẓa i k-iceγben.
Lemmer ẓriγ anda teffer, tili aţa
tefra taluft.
Yenna-k, aha γiwel, kker, aţan zdat-k
tewwurt!
Tebra yemma-k yerna ar lemmer a d-tuγaleḍ
war TANINNA,
ar d ad teţwiqqneḍ zdat weγyul!
Imiren tenna-yas yemma : D
acu k-yuγen kečč tura,
tumneḍ yeẓra anida-ţ, seg wul?
Aha kemmini ṭṭef imi-m, ur d-ggar ara
iman-im!
Akka i s-yenna baba s leεyaḍ.
Yemma afran ur d as-d-yeqqim, tugdi tekcem-as idim,
tesusem, teqqel am weblaḍ.
Kkreγ ţlusuγ abernus, baba ireggem
deg-i, yesrus,
neţat di yir ddunit ay tella.
Tekmes-iyi-d lqut s afus, tenna-k berra a mmi ur
ţnus,
ruḥ kan γer xalti-k MILA.
Ur d-zziγ i wedrar takurt, deffir-i teṭṭerḍeq
tewwurt,
imeẓẓuγen-iw bubben-d imeṭṭi
n yemma.
Yesefk ad bedleγ tamurt, waγzen-nni n
baba yugar lmut,
ad iyi-yaf γer xalti MILA.
Adfel yebda-d asxencef, asemmiḍ deg-i
izellef,
aḍu i usuḍu-s yerra-ţ.
Ay aḍar ddu ur kerref! Γef TANINNA ul
yeknef,
wisen meskint anida-ţ?
Axxam n waγzen a t-ğğeγ, weltma
ilaq a ţ-id-afeγ,
ad nedder nekk yid-s anda nniḍen.
Deg webrid-iw imiren ṭṭfeγ, seg
usemmiḍ d ṭṭlam d-mlaleγ,
tugdi tesergagi-yi iḍarren.
taqabact γef tuyat i ţ-serseγ,
tefka-yi kra n tebγest is zemreγ,
ad mmagreγ tugdi d iyi-yeṭṭfen.
Ggulleγ ar deffir ur teqqleγ, s uḍar
deg tikli greγ,
anṣuf s wayen a d-yasen!
Tedduγ i ṭṭlam d usemmiḍ,
akken izeggen yiḍ,
sliγ i yeqjan seglafen.
D tideţ ayagi tesliḍ? Asteqsi-yagi deg-i
yeţwernenniḍ,
am wakken ur umineγ ara imeẓẓuγen.
Dγa deg unehhit rriγ, acku deg wul-iw ẓriγ,
d kra n taddart i d iyi-iqerben.
Deg leḥsab-iw suliγ, seg wakken
dgedgeγ, εyiγ,
d tirga n yiḍeṣ i d-yesqerbuben.
Deg taddart-agi ad ṭṭṣeγ,
deg-s γef weltma azekka a d-qellbeγ,
ma ulac-iţ ad kemmleγ abrid-iw.
Γer wexxam amenzu d tikli wwḍeγ,
sliγ i useglef, nneqlabeγ,
iqjan ddan-d deg leεqab-iw.
Segmi i ten-ugadeγ, uzzleγ, sin iberdan i
d-mlaleγ,
yal wa lewhi-s s anda yuγ.
D win ur nban sani, ay ḍefreγ, deg win n
taddart zegleγ,
tugdi si leεqel tesuffuγ.
Lḥiγ kan kra iqeddimen, afeγ ẓẓerb
yemmuger-iyi-d.
Iḍan deffir-i seglafen, a yemma lmut tewweḍ-iyi-d!
Zzewreγ tamuẓiṭ n weεwin,
sefleγ-ţ si ẓẓerb akin,
s uγiwel ğellbeγ fell-as.
Iqjan-nni wwḍen-d din din, cfiγ γef
yini-nsen di sin,
ameqqran mellul, wayeḍ berriket ṣṣifa-s.
Wali tura a lhemm amcum, mi ara s-dduklent i yiwen!
Rniγ-d aγilif n weqjun, tesemγi-d
lmeḥna n baba acciwen.
Ihi segmi menεeγ i yiḍan, ur d
asen-d-yegri wefran,
ula d nutni uγalen bernen.
Ay aεebbuḍ-iw yebḍan,
rewleγ-d i yeqjan yesḍen,
a ziγ di tmeqbert i greγ iḍarren!!!
Ad qqimeγ ugadeγ lmut, ad ffγeγ
ad iyi-gezren yeqjan
Sifrer ay allaγ tagut, seḥlu-yi a
sarjan!
Mačči d lmut yakk tqeffart, yak
imezdaγ-is d at laxert,
akka ay nniγ i yiman-iw.
Γas tugdi tesemγer-iyi tamart, ddmeγ
ṭṭṣeγ di temqbert,
sburreγ s ubernus-iw.
Taqabact deg ufus i ţ-ṭṭfeγ,
asemmiḍ seg-i yeffeγ,
ţuγ tawaγit n baba.
S useglef n yeqjan twennseγ, ddeqs ay
qqimeγ,
tuγal tewwi-yi tnafa.
Γas ma si εeyyu dgedgeγ, azekka-nni
zik i d-kkreγ,
yuγal-d usemmiḍ bu tlufa.
Deg wallen-iw mi akken d-refdeγ, walaγ
kan taddart, ğellbeγ,
neṭgeγ-d si ṣṣur γer
berra.
Kecmeγ γer tlemmast n taddart,
urğaγ a d-akin medden.
Nniγ-as anṣuf i tafat, mi walaγ
amγar d-yeffγen.
Argaz-nni yeḥdeq, yeẓwer, d azul
fell-ak a mmi i d-yezzwer,
sakin yefka-yi-d asteqsi.
D anwa i d nekk i ira ad iẓer, nniγ-as
azul a baba amγar,
nekkini mačči n dagi.
A mmi atan wudem-ik werraγ, ahat ur teṭṭiṣeḍ
ara.
Yenna-k daγen akka walaγ, εeyyu d laẓ
ur k-zgilen ara.
Yya-d ad tedduḍ s axxam tura, anef ad nennejmaε
si berra,
kker kan ihi a mmi ad nruḥ!
Amzun tesεeddaḍ-d lgirra, yesefk-ak ad
teččeḍ kra,
akken a k-id-yuγal rruḥ.
Ddiγ yid-s s axxam-is, neṭḍeγ
deg-s am yebki.
Dγa nufa tameṭṭut-is, tesers-d
tacewwaṭ s uyefki.
Uγaleγ-d zik as-agi yerna wwiγ-am-d inebgi,
yesenεet-d γur-i s ufus.
Tamγart tesaked-d deg-i, tasa-s fell-i
tergagi,
tenna-yas “s uḍar ayeffus”.
Tezzi-d γer γur-i, tenna-yi: A mmi aql-ak
am uqeclaw.
D acu yeḍran yid-k akkagi? Ufiγ deg
usemmiḍ aεlaw.
I lkanun terna isγaren, seḥmaγ
ifasen, iḍarren,
ččiγ tacewwaṭ s uyefki.
Syen akin ffγeγ-d sγur-sen, γas
bγan ad qqimeγ yemγaren,
tagnit ur d iyi-ten-tefki.
Twalam abrid amek yenneḍ, amek d-ṛwiγ
akesar d usawen?
Taddart teţak-iyi-d i tayeḍ, almi i d-wwḍeγ
γer tagi-nwen.
Azgen wis-sin n targit-iw, yesmekti-yi-d d temẓi-w
d wamek d-kkreγ s imawlan.
Zgiγ γliγ γef uxenfuc-iw, maca,
sekfeγ imeṭṭawen-iw,
kečč d argaz i d iyi-nnan.
TANINNA ma yuγ-iţ kra, cfiγ tezmer
ad teţru.
Ma yid-i ayen yebγun yeḍra, iẓri-w
yekfa-yas wemru.
Baba ula mi ara d iyi-yewwet, ur ţeqqed tasa-s
yiwet,
ad yeggall deg-i, ur ţruγ.
Yemma s yiles-is teserwet, γur-k ad as-inin
medden a lmeţwet,
d tasa n tyaẓiṭ i k-d-nuγ!
Am ukufi qqleγ qebbaγ, acku zgiγ
qebreγ,
imeṭṭawen sebken deg-i.
Mmektiγ-d tura amek i d-kkreγ, d imeṭṭi
aql-i serrḥeγ,
yeţcercur yeẓri, ur ineggi.
I yeḍran d uqerruy-is, ay annect yeţwaḥqer
di temẓi-s,
a ziγ kra n imawlan ţγurrun.
Mi slan lγaci i lehdur-is, neţa iseffeḍ
imeṭṭawen-is,
nutni daγen yid-s ţrun.
Neţa yemmal-d ayen t-yuγen, imeṭṭawen
deg-s teffγen,
tamusni teddem-d aεekkaz.
D azref n tideţ i d-isuγen, yeffeγ-d
akk wayen merriγen,
yeqqel meẓẓiy am zik, wergaz.
Wehmen akk lγaci-nni, TAFAT tneggez s igenni,
tenna-yas" tuγaleḍ am wiyaḍ"
yekker, yuzzel iwala lemri, yufa d tideţ
yeqqel meẓẓiy,
tamendit tekker i leεyaḍ.
Yir tirga-s din i mmutent, rnant ţwameḍlent,
yuγal-it-id ser-is amelḥan.
At taddart merra sudnen-t, s igenni refden-t,
ţsuγun " yuγal d acebḥan".
Ay imi n TAFAT tesneḍ, d acu ara
d-tesufγeḍ,
atan dγa wamek d-yedden:
" Kker tura ad tuγaleḍ γer taddart,
ad tzedγeḍ,
aql-ak am kečč am medden!“.
yedda yid-sen din din, wergaz, yeğğa
axxam-is akken yella.
Ur yerfid yid-s awezwaz, yuγal s axxam
s-d-teğğa BISBISA.
Ferḥen akk medden s lğar, tayri-nsen
γur-s teffeγ-d εeryan.
Sawalen-as am zik BAB IDURAR, γas akken yeqqel
d ameẓyan.
S yisem-nni yuli-yas ccan, yeẓẓel,
iεeğğer deg wulawen.
Medden akk deg seksu-s ččan, deffir kra
kan n wagguren.
Derrzen-as at taddart tameγra, at tudrin-nniḍen
usan-d γer ṭṭbel.
Reclen neţa d SEKKURA, ajuğğeg n wul
yenγa aγbel.
SEKKURA tella d tamburt n taddart, imawlan-is zik i
mmuten.
Ilmeẓyen γur-s d tamyezwart,
bγan-ţ, neţat tugi-ten.
Ḥemmlen-ţ akk, acku tecbeḥ,
neţat tḥemmel tilelli.
Ur tesin " anεam, yerbeḥ",
tawwurt yiwen ur s-ţ-id-telli.
Asmi d-yuγal BAB IDURAR, tḥulfa s wul-is
yemḥaḥed.
A lqecc-iw, ay axeṣṣar, kfan wusan ideg
ur qbileγ ḥedd!
Ihi tura amek ara texdem, tayri thedder war ṣṣut.
Tufa-d tifrat mi akken txemmem, yergagi wul n tmeṭṭut.
Nekkenti s tilawin nezga, neţrağu-ten ar
d aγ-xeḍben.
Zgant xerbent-aγ tirga, acḥal n tinna i
iselben.
Amek ara ṭṭfeγ iman-iw? Γer
γur-s yesefk ad ruḥeγ.
Yesefk a t-awḍen iḍarren-iw, s uqerru-w
ar d at-awḍeγ!
Yiwen wass tewweḍ-it s axxam-is, terra-t
yeldi imi-s,
ur yumin ara ayen iwala.
Argaz yergagi wul-is, twala mi ceṭṭḥent
wallen-is,
teţerqiqis deg-sent leḥmala.
Yeqqel amzun yekcem εemrayen neγ
yeţu, dayen,
teffud, telluẓ neγ terwa.
Tcebbeḥ-as-d imeslayen s tiẓeṭ
γlayen:
"Σni tfuk-ak lqahwa"?
Yenna-yas " ala, tella", yecreh wul-is mi
yesla,
tenna-yas" mačči akka i
k-sneγ".
Yekker yeseww-as-d lqahwa, tayri tesekcem-as tawla,
yerran udem-is d azeggaγ.
Iεewweq amek ara yexdem, ira a s-yini " ḥemmleγ-kem",
maca, ur yezmir ara.
Yeqqur, yesbek, yesusem, yuγal deg wawal
yekcem,
di tlufa n taddart yeẓra.
Udem n SEKKURA tuli-t tezweγ, ma d awal am terṣaṣt
i d-yeffeγ,
γur-s tabγest, teldi imi-s :
As-a γur-k imi d-kecmeγ, akken ad
nemmeslay fell-aneγ,
mačči γef taddart d imezdaγ-is.
Yesusem BAB IDURAR, neţat ur d-nusi s urar,
tewwet azrem s aqerru.
D awal yelhan i d-tezwer, tehder-as-d γef
leqder,
tekkes i yiman-is akukru.
Kečč temgaradeḍ γef wiyaḍ,
deg warrac d tilawin teţqadareḍ,
annect-a yezga-d γef wul-iw.
Awal deg yimi n wergaz yenneḍ, a tideţ
as-a ad twehmeḍ,
ad teţsuγuḍ " ufiγ
iman-iw!".
Tenna-yas " d acu ara tiniḍ, ma yella tebγiḍ,
akka d afella ad nedder akken?".
A tibḥirt ansi d-temγiḍ?
Ijeğğigen is d-tegliḍ,
deg wul-is d awezγi ad faken!
Tlul-d tebγest si tmendit, ayen ur nelhi
diri-t,
γef lehhu, acuγer nesusem?
Argaz teffeγ-it tergigit, lqedd-is yerfed-it,
yenna-yas " ula d nekk
bγiγ-kem".
Γileγ tugiḍ ad tjewğeḍ,
ugadeγ kan ad iyi-d-terreḍ,
am wiyaḍ akk, γef tewwurt.
A tayri nesla mi tesusmeḍ, nesla mi tekkreḍ,
myeẓmaḍen wergaz d tmeṭṭut.
Timerğa tenna " dayen!", a kra
yesalayen
ẓẓerb ger wulawen, ihudd!
Lemmer a d-twalim a medden, amek i msudanen,
a d-temmektim Huliwud.
Isali ulac anda ur yewwiḍ, wa yeqqar i wayeḍ
" tesliḍ,
s BAB IDURAR d SEKKURA?".
Ay akud kečč teţnejliḍ, a temẓi
skud ur ten-teğğiḍ,
kra n smanat kan teḍra tmeγra.
Ur uklalen ayen n diri, bu wul ur nelhi, yugi ad
yasem.
Ddren deg irebbi n tayri, yal targit deg-sen
tekcem.
Ay akniwen, anwa ur neẓri, i yeḍran mi
d-tlulem?
A tiẓeṭ yuran γef yiri, a TAḌṢA
ay ASIREM!
Iswi n BAB IDURAR iban am win icummen akken a
d-yeεḍes.
Yenna " imezwura-nneγ nnan: " Eḍṣ
i tmeddurt, ad ak-d-tḍeṣ!",
ul n tmeddurt anwa ur t-nesin? Deg-s teqreḥ,
deg-s tamendit.
S yisem n tarwa-nneγ di sin, ad nesfillet i taḍṣa
d talwit".
Deg wul-is ţεebga ur tmal, amgared
yeggull fell-as.
ur yerri imdanen am lmal, γur-s yiwen-nsen
arrac d tullas.
Yesker-d tarwa-s yerna yesen, lecγal-is akka iferrun :
Di sin zemren ad ḍṣen, di sin zemren ad
ţrun.
Ul-is teččur-it tmendit, ṣṣbeḥ
neγ tameddit,
leεtab yesfeḍ-it liser.
Yedder d twacult-is di talwit, di taddart TALWIT,
s tiẓeṭ, ccbaḥa d ser.
Tamacahut-is tura TAFAT mi d-teffeγ, adlis-is
d amenzu i yezdeγ
axxam rran i yedles.
D axxam n-yeğğa deg umadaγ, gan-as
yes-s iseγ,
yers i umezruy γef yiles.
S tideţ amarezg-is, yak yufa iman-is,
fell-as tgerrez ddunit.
Yedder s tezdeg, tamendit d tayri n tarwa d tmeṭṭut-is,
rnan ḥemmlen-ten at TALWIT.
Tasa tamcumt tesawel-d, as n ccreε-ik ay wul
yewweḍ-d,
abrid n tuffra diri-t.
Ay ayen yeffren ffeγ-d! Iḥulfan deg-s
suγen-d,
sumlen-t asen tameddit.
Aqerru-s yekcem deg tmacahut-is, yečča
kan imensi-s,
yenna i twacult " iḍ ameggaz!".
Izeggen yiḍ ur yeṭṭiṣ,
yeţbeddil deg yidis,
yemmekti-d weltma-s, wergaz.
Yemmekti-d daγen d yisem-is, winna i d as-fkan
di temẓi-s,
asmi d as-semman ZIRI.
Yuγal yesteqsay deg yiman-is, wisen amek teḍra
d imawlan-is,
wisen TANINNA d acu s-yuran γef yiri?
TANINNA ahat tsellek iman-is, baba d neţa i d
waγzen s yimmad-is,
i tmeγdurt-nni n yemma?
Teqqim γur-s di lğal n warraw-is,
nerwel-d, neffer γef wallen-is,
wisen ma mazal-iţ γer baba?
A ziγ ur fuken ara imeṭṭawen-iw,
nedfen ideddicen n tasa-w d wul-iw,
d nutni i d idim d-yeffγen.
Azekka ad ṭṭfeγ abrid-iw γer
taddart n imawlan-iw,
ad ẓreγ d acu i ten-yuγen.
Azekka-nni zik i d-yekker, ayen yellan yesefk a
t-yehder
d tarwa-s yakk d tmeṭṭut-is.
Akka i d neţa BAB IDURAR, fell-asen kra ur t-iteffer,
i tideţ yeldi ul-is.
Yenna-yasen as-a εewwleγ, s imawlan-iw ad
awḍeγ,
ad ẓreγ amek i d asen-teḍra.
Kkes anezgum akk fell-aγ, awi talwit d
ak-sarmeγ!
I d as-terra SEKKURA.
A TAḌṢA ay ASIREM, yesefk γer
yemma-twen ad tḥedqem!
Kkes anezgum a baba!
Argaz γer udaynin yekcem, yebra-d i
uεudiw yellan yeqqen,
yebberdeε-it di berra.
Yelsa abernus d acebḥan, yeṭṭef
abrid s ayen t-yerḥan,
tasa-s d tikli ad tebḍu.
Medden akk d-yemlal γur-s ḍṣan,
deg webrid ideg yekka sa wusan,
yewweḍ taddart TIZI N WAḌU.
Abrid akken ira yenneḍ, taggara-s yusa-d
wass-is.
Lewhi usiwreγ n yiṭij i yewweḍ
γer taddart imawlan-is.
Am uberrani, yiwen ur t-yesin, yemlal-d
tamγart d tamezwarut.
Teddem-d taqecwalt n tbexsisin, d tamγart i
wumi tekna teεrurt.
Azul a yemma tamγart, yella WAKLI N AT WADDA
deg wexxam?
Tamγart tekfa-yas tezmert, ma d aqerru-s
yeqεed i ţexmam.
S " Wazul a mmi" i s d-terra awal,
tesaked deg-s tmeṭṭut.
AKLI atan seddaw wakal, aṭas aya segmi
yemmut.
Yeğğa-d TAKLIT deffir-s, tezdeγ
iman-is kan di lḥara.
I ijerrden di twenza-ines, meskint d ayen ur tuklal
ara.
Γur-s taqcict d weqcic rewlen yerna di ccbaḥa
ifen yal d itri.
Yiwen ur yeẓri anida hemlen, ismawen-nsen
TANINNA d ZIRI.
TANINNA terwel zdat tmeγra, tugi jjwağ s
yiγil.
ZIRI yesuffeγ-it baba-s si lḥara, akken
ad inadi γef weltma-s i t-iγil.
Aggusen-is mi ay γlin fsin, usan-is am
tcemmaεt ay xsin,
kra n wagguren kan i yewwernenneḍ.
Segmi ur d-brinen warraw-is di sin, dγa yemmut
WAKLI meskin,
tesaweḍ-it lkiyya anda ad naweḍ.
TAKLIT tezga γef ṭṭaq, melmi a d-flalin
warraw-is.
Maca, γas ul-is iḍaq, arraw n weltma-s s
idisan-is.
Tamara n zik ur d-tegri, ur yeffir tayri,
ur yeskif imeṭṭawen-is.
Ihedder, ineggi yeẓri, yenna-yas " d
nekk i d ZIRI",
tamγart serrḥen iḍarren-is.
Akken tesla kan i yisem-is, amzun tesker amutur.
Qqlen am ifeṭṭiwjen iḍarren-is
yerna tella tesqudur.
TAKLIT wa TAKLIT! TAKLIT wa TAKLIT!
Ay a lxir-im yusa-d mmi-m!
Ansi tekkes aḍar yerr-it, temmuger-iten-id s
tazzla TAKLIT,
a ziγ γef ṭṭaq i tella
teqqim.
Ayen yeḍran mačči d urar, lḥif
yexdem deg-s ccγel-is.
Iwala-ţ BAB IDURAR, amzun yessa wedfel
γef uqerruy-is.
Maca, γas werriγ wudem-is, yekmec
weksum-is,
iγsan-is banen ğehden.
Tbedd teţmuqul mmi-s, ur tumin ara allen-is,
tagi d targit a medden!
BAB IDURAR iger-as iγallen-is, yeẓmeḍ
yemma-s s idmaren-is,
iẓri-s yeḥmel yeţcercur.
TAKLIT daγen tḥebba mmi-s, kecmen-as s
imi imeṭṭawen-is,
rγan am kra mi ara d-ifur.
Seg tmendit yeččuren ul-is, ṭṭreḍqent
tliwa deg wallen-is,
ula d tamγart-nni teţru γef
leγrur.
Qqimen yiwen ur yeldi imi-s, ţemyesmuqalen
yemma-s d mmi-s,
d iḥemmalen-nni ay sqedcen deg wadeg n
lehdur.
Dayen ur d-yeqqim ukukru, argaz yezmer ad
yeţru,
deg imeṭṭi tεawen-it yemma-s.
Afus-is tugi ad as-tebru, testewtew-as kra s
aqerru,
testeqsa-t ma yufa-d weltma-as.
Anehhit yeffeγ-d seg yimi-s, ihuzz aqerruy-is,
yeţru, yesaked igenni.
TAKLIT s axxam tewwi mmi-s, tenna-yas i
tmeddakelt-is:
Yya-d a ZIKA ula d kemmini!
ZIKA tekcem s axxam yid-sen, TAKLIT teseww-d
lqahwa.
BAB IDURAR iger afus-is a ţ-iεiwen, d
neţa i wumi yehwa.
Tenna-yas " qqim kan, acimi? Γas ulamma
sεeddaγ, ulseγ lgirra urumi,
lqahwa mazal zemreγ-as.
Iγef ZIKA tecfiḍ a mmi? Ḥala nutni
i d iyi-d-ibedden i tewwurt γef yimi,
neţat, xalti-k d warraw-is, yal as.
Qqimen drus kan di kraḍ, yeččur-d
wexxam d medden.
Yekker-iţ hetwir d leεyaḍ, yal wa
amek la itedden.
Am tnamit tilawin, kecment-d s tmellalin,
a lxir-im yusa-d mmi-m!
Sekrent urar, tiγratin, i wigi ansi akka
d-γlin?
Ldi a TAKLIT imi-m!
A mmi anida teffreḍ iman-ik? Teţu-k
taddart-ik,
fell-ak negzem asirem.
I yeḍran d tasa n yemma-k di lğal-ik, i
weltma-k meqqar ẓrant-ţ wallen-ik?
Ula d neţat d aqerru n lhemm.
Kečč daγen atan icab uqerruy-ik,
ibeddel akk wudem-ik,
yesla i lehdur, yesusem.
A BAB IDURAR teldiḍ imi-k, teskaddbeḍ
imeẓẓuγen-ik!
D yemma-s ideg yewhem.
Yewhem mi d as-yesla tenna, ğğet-t ar
d-yeqqim a tarwa,
mazal ẓriγ kra ula d nekkini!
Argaz werεad yesteεfa, d acu tebγam
tura?
am tin yennan ffγet syagi.
Zik-nni mačči akka i tella, imiren
γas ma ur d as-yehwi kra,
tezga meskint teṭṭef imi.
Ur teqqar uhu neγ ala, ayen yebγun yeḍra,
teţseḍḥi a d-tini acimi.
Lγaci-nni uγalen ffγen, deg wexxam
di kraḍ i d-qqimen,
neţa, yemma-s d ZIKA.
Kra yekka yiḍ ur ṭṭiṣen,
myeḥkun ayen yeḍran yid-sen,
tezwar-d TAKLIT tenna :
Seg wasmi teffγeḍ a mmi, baba-k ur yeṭṭiṣ,
ur yečči,
yurğa-k a d-tawiḍ TANINNA.
Yerna lhemm n at taddart-agi, qqaren-as nnif-is
yeγli,
mačči d argaz i yella.
Wwḍeγ almi d as-nniγ
: Ay argaz akka ţwaliγ,
yif-it ad nbeddel tamurt.
Yugi, ma s azniq ur yeffiγ, yiwen wass kan
almi t-ufiγ,
yeqqur deg wussu, yemmut.
Meskin tenγa-t lkiyya, sţsebba-s d wigi
yeffγen sya,
d ul-is ahat i iḥebsen.
As-a kecmen-d γur-i merra, amzun acemma ur yeḍra,
walan abernus-ik d uεudiw-ik cebḥen.
Numéro 87 Janvier 2017
